O le auga o le faigapaaga a le kamupani telefoni a le Digicel Samoa ma se tasi o ofisa inisiua i le atunuu poo le National Pacific Insurance e ofo ai le auaunaga i ana paaga e faafaigofie ai le totogi o inisiua e faaaogaina auaunaga a le kamupani telefoni ua ta’ua o le MyCash.
I se faamatalaga a le Pule o le NPI Vaafusuaga Raymond Tonumaipea, o lenei auaunaga o le a fesoasoani tele lea i ana paaga e faafaigofie ai ma sefe ai le faatinoina o le totogiina o inisiua.
“O lea la ua iai lenei auala e fesoasoani i si a matou auaunaga i le atunuu e faigofie ai ma sefe ai foi le tau afifio mai o le mamalu o le atunuu i le ofisa e faatino ai lea vaega.”
Ta’ua e le Pule Sili a le Digicel Samoa, Anthony Seuseu o se tasi lenei o vaega o loo faamuamua e le kamupani e ala ia latou auaunaga e ofoina atu i le atunuu.
“O la matou galuega vaavaalua ma le NPI o se isi lea laasaga ina ia mafai ona agai pea i luma la matou tautua i le atunuu e ala lea i auala faatekonolosi ua o matou faatinoina i lenei vaitau.”
O le MyCash app o se auala pito sili ona telē ona aogā e ala i le faaaogaina o telefoni feaveai i auaunaga tau seleni.
O lenei foi auaunaga e mafai ona maua ai seleni o loo lafo mai i atunuu mamao.
