O le Kolisi Maualuga a le ekalesia a Iesu Keriso o le Au Paia o Aso e Gata Ai le CCWS i Pesega na muamua afea e le ta’ita’i malaga, o le faiaogaulu ma se tasi o faia’oga lagolago ma se tasi o tama o le tatou Manu Samoa 15, e faaevaeva iai le Ipu o le siamupini o le taamilosaga a le Pasefika.
O le faiaoga lagoago le susuga Mase Mahonri Schwalger ma le alii taalo o Theodore McFarland o ni tama tuai o lea kolisi ma o se avanoa lea na toe feiloai atu ai i laua i faiaoga ma fanau, o se mitamitaga i le alii Pule ma le pulega o le kolisi maualuga i Pesega.
O Theodore McFarland ua taalo nei i le kalapu lakapi o le Saracens, ae sa ia laei le togiga lanumoana a le Manu Samoa i le taamilosaga o le Ipu a le Pasefika. O le faai’uga o le vaiaso e afea ai nisi o kolisi i Upolu e nisi o le pulega o le Manu Samoa ma le susuga Theodore McFarland e lē gata i le faaevaina o le Ipu, ae o se avanoa e faamalosiau ai i fanau a’oga e atina’e taaloga o isi avanoa lelei mo i latou i le lumanai.
O loo iai foi le fuafuaga e faatino lenei asiasiga i a’oga i Savaii.
