O le afioga i le Ao o le Malo, o le afioga i le tamaitai Palemia, ma le afioga i le Fofoga Fetalai o le Palemene, na faatumutumu iai mamalu maualuluga na auai e molimauina le faaeeina atu o le tofi ma faailoga o le Matua o Faiva o le Polofesa o le Feagaiga Fou poo le Professor of New Testament, i le susuga i le faifeau, Pule o le Kolisi Faafaifeau i Malua, le susuga ia Rev Dr. Vaitusi Nofoa’iga. O se sauniga foi na faia i le malumalu o le Iupeli i Malua na auai le alii Polofesa o loo faauluulu iai polokalame tau aoaoga o le mataupu silisili ile Iunivesite a Otago i Niusila, aemaise o le paia o faauluuluga o le Ekaleasia Faapotopotoga Kerisiano Samoa ma le ‘au usufono o loo auai i le fono tele o lenei tausaga.

O le failautusi o le Komiti o Malua le susuga i le faifeau toeaina, Amuia Seuala na ia faailo, le filifilia o le Pule o le Kolisi Faafaifeau a le Ekalesia e faaee iai le tofi Polofesa o le Feagaiga Fou. 

Le Failautusi o le Komiti i Malua susuga ile faifeau Toeaina Amuia Seuala.

Na maua le avanoa o le Pule o le Kolisi Faafaifeau i Malua e molimoli ai lana faafetai ile ekalesia i ona taitai, faapea ona aiga ona o le tapuaiga ua a’e manuia ai lana faatautaiga ma ausia se isi laasaga maualuga e tautua ai le Ekalesia Faapotopopotoga Kerisiano Samoa. 

Le susuga ile faifeau Rev Dr Vaitusi Nofoaiga o le Pule o le Kolisi Faafaifeau i Malua, o le Polofesa o le Feagaiga Fou.