Ua faaauau ona seei le afioga i le tamaitai faamasino o le faamasinoga faaitumalo le afioga Talasa Atoa Saaga, i le suesueina o moliaga o le ulugalii o Samuelu ma lona toalua o Sivai, ina ua teena le la talosaga e faasee ese le faamasino ona o e iai ona sootaga vavalalata o lē o loo tagi faasaga i le ulugalii le faipule o Faleata 3 le tofa Lealailepule Rimoni Aiafi.

O lea sootaga vavalalata e pei ona sa finauina e loia a le ulugalii ona o le faamasino e tapuai faatasi i le lotu Peace Chapel ma lē o loo tagi, ma o le faamasino foi e iai lona tofi tiakono i le ekaleasia.

O le tuua’iga lea na faasa’o e le faamasino i lana faai’uga ma ia ta’ua ai e lē o ia o se tiakono ae o lona toalua e umia lea tofiga.

O loo faaauau pea ona taofia Samuelu ma Sivai i le vaaiga a leoleo ina ua lē talia foi le la talosaga e tatala i tua e faatali ai le suesueina o o la moliaga.

O loo tālia le la talosaga e toe iloilo ai lea faaiuga poo se apili, o le a tagofia e le Faamasinoga Maualuga.