Talu ona mata’itū e le ofisa o le Pule Faatonu poo le Regulator le faaulufale mai i Samoa e nisi o fesoota’iga initaneti o le Starlink, ma saili ai poo ai i latou ia ina ia tausisia ala o le tulafono o fesoota’iga e faaaogā ai, o lea ua faailoa e le Pule Faatonu le afioga Lematua Gisa Fuata’i Purcell i auala o faasalalauga a lea ofisa o le Malo, le avanoa mo le aso 21 lenei o Aokuso e susū atu ai e lesitala ma faia le laisene e faaaogā ai lea auala o fesoota’iga, a o lei motusia lea fesoota’iga mo tagata e lei lesitala faaletulafono i le Aso Tofi o le vaiaso nei le aso 22 o Aokuso.

O le Aso Lua o le vaiaso nei na faailoa ai e le Pule Faatonu le faaauau pea ona faaaogā o le Starlink e tagata ua uma ona lesitala faaletulafono, ma ua mae’a foi ona siaki a latou masini e le ofisa o le Pule Faatonu.

Ae mo ē o loo iai lea fesoota’iga ae e lei lesitalaina pe ua avatu foi i le ofisa a latou masini mo le faia iai o sailiiliga, o le a lē toe maua le Starlink.

Faaalia e le Pule Faatonu o le tāua o le tuuina atu o masini o lea fesoota’iga mo sailiiliga a le ofisa, ona a mae’a ona ave lea i le kamupani o le SpaceX le numera faamauina o le masini e mafai ai ona maua lea fesoota’iga.