Ua tumau nei ona iai Samoa i le Laasaga 3 poo le Alert Level 3 le lanu mūmū mo le isi 14 aso e amata atu i le vaeluaga o le po anapo 23 Mati 2022 seia oo i le vaeluaga o le po o le Aso 5 o Aperila, o le saunoaga lea mai le Tamaitai Palemia Fiame Naomi Mataafa.

I le 14 aso ua faaopoopo i le tapunia ai o le atunuu o le a faalua i le vaiaso ona tatala nisi o auaunaga moomia mo le mamalu o le atunuu i taimi faatulagaina aemaise o faleoloa mo faiga o faatauga ma nisi o auaunaga. 

O ia aso o le a amata atu i le Aso Lulu 23 o Mati ona fetuunaiga ua auina mai i le faasalalauga, 26 o Mati, 29 o Mati, Aso 2 ma le Aso 5 o Aperila mai le 8am – 2pm. Ua na’o le pau ia o aso ua faatulagaina e tatala ai ia auaunaga moomia.

Ua fautuaina ai foi e le Tamaitai Palemia le mamalu o le atunuu ina ia lavapapale ma onosai a’o galulue ai le Matagaluega o le Soifua Maloloina faapea le Komiti o Faalavelave Faafuasei i le unaiga o puipuiga mai le pepesi o le vairusi.