E silia i le ‘afa miliona le aofa’iga o fesoasoani tupe ua faasoasoa atu e le asosi o tama ma teine tuai o le Malisi i Samoa, e lagolago ai le faatupeina o totogi o faia’oga i le kolisi o Sagato Iosefo ma le a’oga tulagalua o le Malisi i Mulivai, faapea le fausia o le hall o le Malisi ma foa’i tupe mo le nofoaga o tamaitai Sa monike i Vailima, ma le nofoaga o le Mapuifagalele o loo tausia ai tina ma tamā matutua i le motu o Upolu.
E 300 afe le fesoasoani i le hall a le Malisi, ae ta’i selau afe tala mo le a’oga a le Malisi i Mulivai ma le kolisi o Sagato Iosefo.
E tai lima afe tala ua fesoasoani ai i le nofoaga i Mapuifagalele ma le nofoaga o tamaitai Sa monike.
Faaalia e le Pelesetene o le asosi a tama ma teine tuai o le Malisi le afioga Tuatagaloa Aumua Ming Leung Wai, o le faailogaina o le senetenali poo le selau tausaga talu ona faatūina le asosi ua faamaopoopo iai tama ma teine sa aooga i le Malisi, o se avanoa tāua sa lafo tupe ai uo ma paaga ma aumeamamae aemaise o sui o le asosi mo le taumafaiga o a’oga a le Malisi i Samoa auā o loo faatupe lava e le asosi le Malisi i Mulivai ma le kolisi o Sagato Iosefo i Alafua.
O le masina na te’a nei o Aokuso sa faailoga ai le senetenali o le asosi, sa auai sui mai atunuu i fafo ma Samoa aemaise sa avea o se mafutaga e amana’ia ai nisi o sui matutua ua loa tausaga o tautua i le Malo aemaise o isi auaunaga i Samoa.
Ua momoli le faafetai a le asosi a le Malisi i tagata uma ma pisinisi tuma’oti sa lagolagoina polokalame uma o le selau tausaga, ua mafai ona faamaopoopo ai se seleni auā ana galuega fai.E tasi le miliona tala sa avea ma taula’iga o tapenaga i se seleni e mafai ona maua peitai e lei faailoaina mai e le asosi pe na ausia lea aofaiga.
