I le tele o poloketi o loo faatāuaina ai tusitusiga o tala o se tasi lenei o poloketi o loo ua faaaogāina ai le tusiaina o ata e toe fafagu ai tusitusiga a le tusitala lauiloa ia Ropati Lui Sitivinisone.
O lenei poloketi o loo faaaogāina ai fanau aoga mai nisi o Kolisi ma Aoga Tulagalua i Upolu e faatinoina ma o loo fesoasoani ai nisi o tusiata lauiloa faatasi ai ma se tasi o tusiata lauiloa o Lalovai Peseta e pei ona silafia ai e le atunuu.
Na ta’ua e le Polofesa mai le Iunivesite i Edinburg, Michelle Keown i vaega o lenei poloketi o loo faagasolo i le taimi nei.
“E tele vaega o lenei poloketi e pei ona iai nisi o tusi komi a le tusitala o tala muamua e lua o loo faatulagaina e le tusiata mai Hawaii o Solomona Eos, ma le lona tolu o loo feagai lea ma se tasi o tusiata mai Peretania o Simon Grennan.
“O tusitusiga o solo o loo feagai lea ma nisi o Polofesa Samoa ma o nei solo o loo gafa ma le tusiata ia Lalovai mo le tuuina ai o ata.
“Faatasi ai ma se aoaoga e autu lea i tusitusiga lea e faia i le vaiaso fou ma o loo valaaulia ai faiaoga e auai ai.”
Na ia ta’ua ai le filifilia o le tusiata e momoli ai lenei feau.
“E pei ona iai nisi o suesuega faaleaoaoga o loo faaalia ai le tāua o le faaaogāina o ata e vave ona pue ai e le tamaitiiti le uiga o le fuaiupu la e faitau pe a iai ma le ata.”
O lenei poloketi o se taimi muamua lenei ua faia ai i Samoa ma o le tausaga e 2019 na amata ai ona faatino nisi o vaega auā le faataunuuina ai o lenei faamoemoe ua faatino.
O loo galulue faatasi ai foi ma le Iunivesite Aoao o Samoa.
