I le tuana’i o aso e fā talu ona tula’i mai le faalavelave tau taavale i se vaega o le alatele o le Mafa pass ma molia ai e leoleo le minisita o le Matāgaluega o Alamanuia, Pisinisi ma Leipa, o lea ua faailoa e le ta’ita’i o le Malo le afioga i le tamaitai Palemia le afioga Fiame Naomi Mataafa, le tuuina atu o le faamavaega tusitusia a le sui faipule o Aleipata Itupa i Lalo mai le tofi Minisita o le Kapeneta, le afioga Faleomavaega Titimaea Tafua.

O le afiafi ananafi le Aso Lulu i Samoa na faailoa faalaua’itele mai ai e le tamaitai Palemia i se faasalalauga le tuuina atu e le afioga Faleomavaega o lana faamavaega tusitusia i le afioga i le Ao o le Malo e tusa ai ma le mataupu 33(3)(d) o le Faavae o le Malo Tuto’atasi o Samoa.

Ua mae’a foi ona laolao lea faai’uga a le sui faipule i se feiloa’iga ma le Palemia, ma ua talia ai e le Ao o le Malo le faamavaega lea na amata faamamalu i le 12 o le taeao o le Aso Tofi lenei i Samoa.

O le finagalo o le Minisita ua faamavae e pei ona faailoa mai i le faasalalauga, ia apo pea le malu o le tulafono aemaise le puipuiga o le ta’uleleia o le malo.

O se laolao tāua foi e tapena ai o ia mo le fofogaina o ona moliaga i luma o le faamasinoga.

Na faaalia lava i le faasalalauga e tumau pea le faatāua o le mau faaletulafono, e lē ta’usalaina se tasi se’i vaganā ua faamaonia e le faamasinoga sana soligatulafono.

E lua moliaga o le afioga Faleomavaega Titimaea Tafua, o le moliaga o le ave taavale faatamala ua mafua ai ona oo manu’a i se tagata ma le moliaga o le ave taavale faatamala.