E masani lava ona iai tapu poo sā i le tele o nofoaga e asia e tagata tafafao e pei o le sā ona lagonaina se leo pe a ulufale pe tuvae foi i se nofoaga i soo se atunuu; e pei foi ona iai aiaiga o le ulufale ai o se tasi i le nofoaga ta’uta’ua ua faaigoaina o le St Peter’s Basilica, i le Vatikano i Italia, a lē usita’ia e tuli pe ave’ese mai i fafo.
E pei o le to’atele o tagata tafafao maimoa atu i Italia, o lea na āsia e se tasi o alii pese opera, e suafa ia Ipu Laga’aia, le St Peter’s Basilica e matamata ma maimoa i foliga vaaia o lenei fale aemaise o tulaga faaaloalo e masani ai mo nisi o pope ua fāi i lagi le folauga o loo lagomau i totonu o lea malu.
E le’i usita’ia e Ipu Laga’aia, ae na ia lagiina se pese ua faaigoina o le Panis Angelicus (The Bread of Life) a o iai i totonu o le St Peter’s Basilica.
Na faamatala e lea alo o Samoa i le NZ Herald, soo se taimi lava e pisa ai le tagata, e mautinoa lava le aga’i atu o se tasi o sikulatī poo le tagata o loo leoina le fale e ‘aua le pisa pe ta’ita’i sa’o lava i fafo, ae peita’i e leai ma se tasi na oo atu e taofi o ia, ma o se tulaga maoa’e lea mo ia.
Ta’ua e Ipu, o se faalogona uigaese le tulaga na ia oo iai, ina ua ia ulufale ma savalia lea malu, na ia faapea o se tulaga ua saga faamausalī ai lona ola faatuatua, ma ua saga faatumauina ai lona fiafia e atia’e lana taleni pese i atunuu i fafo.
O Ipu Laga’aia o se alii Samoa, e 29 tausaga le matua o lona soifua, o ia o se tasi o sui a le New Zealand Opera i le tausaga e 2025, ma o ia foi o le sui a le vaega ua faaigoaina o le Pacific Quartet, The Shades.
Faamauina o le a auai lea alii i faaaliga a le Opera in the Park ma o le a ia faafiafia i le Bruce Mason Centre i le aso 23 o Fepuari.
Na faapea ona amta taumafaiga o le atina’e o le taleni a Ipu i le Iunivesite o Aukilani.
Puna o Faamatalaga: https://www.nzherald.co.nz/entertainment/opera-in-the-parks-ipu-lagaaia-on-his-life-changing-trip-to-italy/TMXUTXEPQBGH7A56M7PKJ3VMA4/?
