E soli e tuutuuga o loo toe faasala ai i latou o loo tipoti mai Ausetalia i lalo o le 501, le tulafono o aiātatau a tagata Niu Sila.

O le faaiuga lea a le faamasinoga maualuga ina ua toe ave e se tasi le malo i le tulafono e faatatau i tuutuuga faapitoa nei e toe uia ai e se tasi ia faasalaga na muamua tuli i Ausetalia a o lei tipotia mai.

O tuutuuga nei e aofia ai le tatau ona nofo i le tuatusi e tuuina mai, faia siaki e sue ai le DNA atoa ai ma fingerprints, ae le gata i lea o le auai i polokalame e toe fuataina ai le mafaufau.

O nei tuutuuga uma i le vaai a le faamasino ua toe faaluaina ai polokalame na ui ai le tagata ua faasala a o iai i Ausetalia ma o loo ioe le faamasino i le finau a le itu tagi e solitulafono.

O se faaiuga o le a toe faamalosia ai le Palemene e faamanino le tulafono poo le toe apili foi o le faaiuga ua tuuina mai nei, peitai ona o lea ua malolo le Palemene faapea ai ma le Kapeneta o lona uiga o le a faatali uma i le tausaga fou.

O le tulafono o loo faasala ai i latou nei na faaofi mai i le 2015 ona o le toatele o le au tipoti mai Ausetalia poo i latou nei sa faafalepuipui, ma e latalata i le 3,000 tagata tipoti ma o le toatele lava o i latou o loo toe solia tulafono.