Tusia – Maina Misa Fomai – Vai
E tusa ma le 126 tagata fou ua faamaonia ua maua ai le vairusi o Koviti19 ina ua maea a latou suesuega.
Ua la’ala’a atu ai le numera o e ua aafia talu mai lava le aso 17 o Mati, 2022 i le 748. O le taimi nei ua faailoa mai e le Matagaluega o le Soifua Maloloina ma le Komiti o Faalavelave Tutupu Faafuase’i e le o iai se tasi o taofia ona o auga tugā o le faamai i le ICU, seivagana ai i latou e toavalu o loo faanofoesea i le falemai i Motootua ona o loo vaaia ai aafiaga o le faama’i ae leo i se tulaga tigaina.
Ua faamauina foi talu mai lava Novema 2020 e tusa ma le 796 i latou na faamauina, ua maua i le faama’i lenei i lo tatou atunu’u.
E ui ina siitia le numera o tagata ma faaopoopo pea, peitai ua vaaia le faaitiitia mai ai mai le lua i le tolu aso talu ai lea sa maualuga ai e silia i le 200 i latou na faamauiina.
O le tu’ualalo a le Matagaluega na tu’uina mai ina ia tautuana i tagata uma e taofi le feoai, ina ia tau tuuitiitia ai le pepesi o le Koviti i le taimi nei.
