Ua tapena tama ma teine tuai o le Kolisi o Sanele i Aukilani mo se fesoasoani e fausia ai le faleaoga. 

O le Kolisi o Sanele o se tasi lea aoga maualuga sa fai ma tumutumuga o vaaiga a aoga maualuluga i Samoa i tausaga ua mavae.

O se tasi o Kolisi sa faamemelo ma avaga iai loto ma agaga o fanau aoga ma mātua ona o le lelei o a latoutulafono e fai ma taiala o fanau aoga, aemaise ai o le lelei o ona malae taalo faatasi ai ma ona faleaoga.

E lē gata i lea o le tausisi o fanau aoga i tulafono i togiga aoga pe a oo ina tuua le aoga aemaise ai o le nofo tumau a tamaiti aoga sa mamalu ma lelei ai le tausiga o tamaiti.

Ae o le tumutumuga lava i totonu o le Kolisi o Sanele, o le lelei o aoaoga a fanau i totonu o potu aoga aua sa aoaoinalava e susuga i faafeagaiga Malisi. O le Kolisi o Sanele na amata na o alii ae alualu talia tamaitai ona ua iai le naunau lava o matua e fia avatu a latou fanau tamaitai i uta i le Kolisi ona o le lelei o aoaoga.  

O le tulai mai o le faafitauli i le taimi nei i totonu o le Kolisi o Sanele e ala ia latou faleaoga ua maitauina ai le tulaga i le pa’ū maualalo o fanau aoga ua iai i le taimi nei i le Kolisi.

Ta’ua e le afioga ia Patele Michael Endemann o se tasi o faafeagaiga o le Ekalesia Katoliko i totonu o Aukilani, o ia sa a’otauina i totonu o le Kolisi o Sanele i tausaga ua mavae, ua faailoa ai e lē o toe atoa se 100 o ni fanau aoga i uta i le Kolisi, ma ua iai ma le lagona faanoanoa alofa i le tulaga ua tulai mai i le aoga.

Ona o le aoga sa maua ai le atamai ma le poto a’oa’oina ma faamanuiaina ai le olaga a’oa’oina. 

E ui i lea faafitauli, ae lē mafai ona nofonofo ai tama ma teine tuai o le aoga o loo aumau i Auklani, ma o lea ua talanoa ai le laulau o tama ma teine tuai o le Kolisi o Sanele e faatino se latou sailiga seleni e faaputuputu auā le faamoemoe mo le toe faaleleia o faleaoga aemaise ai o nisi vaega o le kolisi o loo fia maua ai se fesoasoani i le tami nei.

O lea ua amata mea le mafutaga a Samoa ma e iai le talitonuga e tatau foi ona togi se maa pe fai se sao o nisi o loo i atunuu i fafo.

E lē o ma’oti mai i le afioga ia Patele Michael se aso ma le taimi e ono faataunuu ai se sailiga seleni mo le mafutaga i Aukilani.