Ua faaalia nei popolega a foma’i e iai tomai faapitoa i le su’esu’eina o vailaau mo tuipuipui i le oo mai ai o faamatalaga i le ono taofia poo le faaitiitia foi o seleni mai le malo o Iunaite Sitete o Amerika. Ta’ua e foma’i o le tulai mai o lea vaega e ono pa’ū maualalo ai tulaga taualoa o le gaosiaina o vailaau mo tuipuipui o le Koviti-19.
O le polokalame su’esu’e lenei ua ta’ua o le Global Vaccine Data Network, ma o se tasi o fuafuaga o loo faatino i le Iunivesite o Aukilani, ma o se polokalame, o loo māua ai le silia ma le 300 miliona o tagata e faia iai sa’iliiliga mo le saogalemu ma le lelei o tuipuipui mo le faama’i talu mai le tausaga 19.
Peita’i o le faai’uga o le masina na se’i mavae atu nei o Mati, na faailoa ane ai i le ‘ausu’esu’e, le oo a’e o le faasologa i le taofia o seleni faamatuu mai a le malo o Amerika i lenei fuafuaga e le ta’ita’i o Donald Trump, e pei ona maitauina le tele o fuafuaga ma polokalame ua taofia e lenei faigamalo o ana fesoasoani tupe e faamatuu i le tele o atunuu.
Ua faaalia e sui o le poloklalame o le Global Vaccine Data Network le faanoanoa tele i lenei faai’uga, aemaise ua lata lava ina mae’a vaega uma o le polokalame ma su’esu’ega na gapātia ai foma’i mai lava i le amataga.
Ua ta’ua e le Sui Faatonu o le Global Vaccine Data Network, Helen Petousis-Harris le tāua tele o lenei galuega mo tapenapenaga mo se isi faalavelave faafuase’i e tula’i mai mo faama’i e pei o le Koviti-19, ma i lona iloa e moomia lava le to’atele o tagata e faatino iai iloiloga.
Mai lipoti a le leitio faavaomalo a Niu Sila, na ta’ua ai e le Matāgaluega o le Soifua Mālōlōina lo latou iloa ma ua logotala i lenei mataupu peita’i, i lo latou iloa e le’i oo atu se talosaga o fesoasoani tau seleni e i latou o loo faatautaia lenei polokalame tau iloiloga ma su’esu’ega.
Puna o Faamatalaga: https://www.rnz.co.nz/news/national/559231/auckland-university-covid-vaccine-safety-study-could-lose-funding-in-final-year-after-doge-review
