E faitau afe tagata agavaa i le $350 mai le malo e ono misi lea ponesi ona e leai ni faamaoniga o a latou tusitupe i le IRD. 

O le Aso Gafua o le vaiaso a sau, o le aso muamua foi lea o Aokuso e totogi mai ai le uluai $116 o peimeni e tolu mo tagata agavaa lea na mua’i faailoa mai e le paketi o lenei tausaga e aumai e fesoasoani i le tau o le soifuaga ua iai nei. 

I faamaumauga e tusa ma le 2.1 miliona tagata agavaa, poo i latou nei e $70,000 i le tausaga tupe maua pe i lalo ane foi ma e lē gata e nofomau i Niu Sila, 18 tausaga agai i luga toe e lē o agavaa i le peimeni o loo aumai e le malo i tagata agavaa i le tau mālūlū poo le winter energy payment. 

E ui la e ono agavaa i lea faamanuiaga, peitai afai e leai ni faamaumauga o lau tusitupe i le IRD e lē mafai ona totogi mai. 

I lipoti e silia ma le 700 le aufaigaluega o loo galulue i le IRD ma o i latou nei sa taumafai e fesoota’i i tagata agavaa mo lea peimeni lea e aofia ai ma le aoao mai o faamaumauga. 

Mai le minisita o tupe maua, David Parker o le auala vave lava e faamaonia ai numera o teugatupe o le faia online. 

Ae mo i latou e ono le maua le taimi mo ia peimeni e tolu ona o le tuai ona faamaonia o teugatupe i faletupe, o loo tatala lava pea le avanoa e tala mulimuli ai seia oo i le faai’uga o Mati o le tausaga fou.