E ono asia Samoa e le alii lauiloa i le pasiketipolo i le lalolagi

Ua i luga o upega tafailagi tusitusiga a nisi o ofisa faasalalau i Samoa ma ua faasoa solo e le toatele, le talia ai e le alii o Shaquille O’Neal “Shaq” le faatalauula atu a le SASNOC poo le Komiti o Asosi o Samoa i Taaloga o le Olimipeka ina ia avea lea alii ma malo faaaloalogia i le tausaga e 2023 mo taaloga i Samoa poo le Samoa Games.

O Shaq o se alii na taaalo faapolofesa i le taaloga pasiketipolo ma e 19 taamilosaga poo seasons na taalo ai mo le N.B.A. mo ‘au e 6 e aofia ai le Orlando Magic, Los Angeles Lakers, Miami Heat, Phoenix Suns, Cleveland Cavaliers ma le Boston Celtics. O se sui pasiketipolo o loo ia umia faailoga maualuluga poo tikeri e tolu. E le gata o le atamai o lenei sui taaalo ae o se tasi na faaigoaina o se tasi o tama taalo aupito sili ona lelei i le lalolagi i lea foi taaloga.

I ripoti a le Eyespy na o latou faamaonia ai lea malaga atu o lea alii pasiketipolo tautaua e tauala mai lea ia Tumanuvao Evile Falefatu.

I ata o imeli ma fetusitusiaiga na tuu i luga o le facebook e Tumanuvao o se la talanoaga ma Shaq o loo faailoa ai le tali atu o le Vaega faapitoa a lea alii tautaua i le tusi na tuuina atu ma faapea o lea ua talia e lea alii le talosaga a Samoa.

Ta’ua e Shaq i sana tali tusitusia na tuu atu ia Tumanuvao; “Sure I’ll be in Samoa. I would definitely honour your invite when the management asks me for approval to the proposal you’ll send. And you’re the first person from Samoa I’m talking to. It’s my pleasure,”

Faailoa e le Team a Shaq; “We are pleased to inform you that your invitation letter reached the office and desk of the personal assistant of Mr. Shaquille O’Neal and was forwarded immediately to him,” o le amataga lena o le tusi.

“We are hereby writing to notify you that he has delightfully accepted your invitation, considering the fact that it is a great event and recognizes sports as a whole.”

Na taumafai atu le Radio Samoa mo se faamaoniga mai le Pulega o le SASNOC ae na tali se sui faatuatuaina a le aufaigaluega e le o mautinoa lea vaega ma e toe logo mai pe a maua se faamaoniga.

E ui e le o mautinoa lelei lea tulaga ae ua tele le talitonuga o nisi afai ae taunuu lea faamoemoe o le a tele le faalauiloa atu o Samoa e lea alii logologoa i le lalolagi atoa.