E matuiā tuua’iga a le ta’ita’i o le Itu Agai le susuga Tuilaepa Lupesoliai Sailele Malielegaoi, e pei ona folasia se finagalo o le Minisita o Galuega Tetele ma Fela’ua’iga a le Malo le tofa Olo Fiti Vaai, ina ua faatalanoa i le afiafi o le Aso Sa ua mavae atu nei, e mafua ona o le finagalo o Tuilaepa i se feiloa’iga ma le vasega o tusitala ma le aufaasalalau i le Aso Tofi ua mavae na ia lāgā ai le taavale landcruiser pikiapu o loo faaaogā e le Minisita.
Na faaalia e Tuilaepa i lea feiloa’iga ma tusitala ua iai faiga faavae a le Malo i le faatauina o taavale ma e tatau ona mulimulita’ia e le faigamalo ua iai nei. Peitai na faaalia e Olo na pale atu loa i le tauaveina o le Malo sui loa ma lea faiga faavae ona e pule lava le faigamalo mai lea taimi i lea taimi i faiga faavae, seia vaganā tulafono latou te lē mafai ona suia. Faaalia e le ta’ita’i o le Itu Agai ua faaaogā e le Minisita tupe a le Malo e faatau ai lea taavale ma lesitala i lona suafa, o se tuua’iga e lē o nofonofo lelei ai le Minisita i lana saunoaga fai mai e sese e lē sa’o.
“O le faiga faavae mo le puipuiga o tupe a le Malo i le mea lea o le okaina o taavale. Ua tele mau upu ua agai i le taavale lea e aumai e le minisita o Olo, e faapea ua na aumaia se taavale taugata tele, second hand mai fafo e telē atu le tau, a o lele e maua le taavale i i le, second hand, auā e second hand foi le taavale lea e aumai, e matuā maoa’e le 8 ogaumu, o le matuā saoasaoa lava o le taavale toe ai penisini. E 8 ogaumu, e aumai second hand mai Ausetalia, e 150 afe le tau, ae lele e maua le taavale second hand foi faapea, ae na o le 120 afe le tau. Lona lua, o lea foi ua aumai, faalaisene i lalo o lana taavale, private. O le mea lea e matuā sā lava i le faiga faavae a le malo, aemaise o treasury instructions…..
…….O ta’iala ia e aumai e le Ofisa o le Tupe, o le tulafono treasury instructions, sau a i le taimi sa palemia ai Mataafa, e iai teuteuga atili mo le faaaogāina o taavale. E ala o na faataoto ta’iala ia, e taofia ai minisita corrupt latou te faaaogāina le paoa e aumai ai ni taavale i se tau e lē talafeagai. Aemaise la o le aumai ona lesitala lea o lana taavale; e sā tele le mea lena. Ona o i tonu a e tupu ai le gaoi. E lesitala loa o lau taavale o le gaoi; o le mea lena o le limatagoese. Sa sau la le faasalalauga a Olo faapea, e leaga o le taavale lea o le poloketi. E lesitala la i lalo o ia. Na e sese; o uiga ia e fai e le minisita ma lona faamoemoe e na te avea le taavale. Ma o le taimi foi lenei, manatua o le mea lea e tatau ona tautala i ai le CEO ma le faamaoni. Ae iai foi taimi e gūgū ai le CEO i le fefe, i le ta’ua o le amiotonu ona o lea ua vaai atu i uiga o le malo lea, e te tautala loa i se mea e fai, kuli loa ma oe.”
O le finagalo lea o le ta’ita’i o le Itu agai susuga Tuilaepa L Sailele Malielegaoi i le fono ma tusitala, ae o le finagalo lenei o le Minisita o Galuega le tofa Olo Fiti Vaai.
“I le mea la lea o faiga faavae i taavale lea e faapea mai Tuilaepa e tatau ona ou mulimuli i ai, ou te lē mulimuli i ni ana faiga faavae. O lea a ua iai faiga faavae fou a le faigamalo fou lenei, ma o le mea a ia, e lē mulimuli matou i ni latou faiga faavae. O lea ua sui mai le faigamalo e matou te omai foi matou fai matou faiga faavae, vaganā tulafono e lē mafai ona matou suia……
…..A o mea ia o policies, e pule a le faigamalo latou i mea e fetaui ma talafeagai i le taimi. O lea la na ou alu atu ai loa, assigned le 4WD i le CEO o la’u matagaluega o le MWTI auā e talafeagai. Ia ona avanoa ai loa lea ua leai se pikiapu 4WD e faatino ai la’u galuega asiasi i nuu i tua. … Ae o le mea ou te fai atu ai, a tatou toe tomanatu i tua i le faigamalo lea ua tuanai atu, e la’u ai a latou meamata ma latou popo i taavale a le malo, pau la lena o le mea e sā mai le afioga i le Tamaitai Palemia, e fai galuega ae lē fai ai ni la’uga popo ma ni la’uga fafie. Ia o le tulaga la lena i le taavale, o le mafuaaga lena na ou mafaufau loa o le a saili mai sa’u taavale. Manatua e 9 matagaluega tuma’oti lea ei lalo o la’u vaavaaiga, ma ou te pule ai. O lea la e ia te a’u le avanoa ma le authority ou te filifili ai poo fea e aumai ai se taavale e faaaogā e le ofisa o le minisita. Manatua foi la e to’atolu, o a’u ma a’u sui minisita e to’alua. O lea la na tofia le Pulega a le Suavai, e latou te aumaia le taavale e faaaogā e le isi a’u Sui Minisita, a o le Pulega a le Samoa Shipping Services, o latou lea e aumaia le latou taavale e faaaogā e le isi a’u Sui Minisita. E lē faapea a aumai ona aumai lea o taavale i ofisa o minisita. Leai, e uma a toe faafoi taavale na pe a matou lē toe iai ii, i matagaluega na aumai ai taavale……
…..Ona ou faatonua loa lea o le pulega o malaevaalele, o latou la e aumaia se taavale e faaaogā e le Minisita, ae lē faaaogāina e Olo. Ga la na mafua ai ona deposit le taavale lena i le kamupani a Ausetalia, ona e lē o mafai e le ASCO Motor iinei a tatou ona supply le V8 Diesel lea na ou mana’omia ona e fetaui i la’u galuega. Ona faapena loa lea ona deposit le tupe lena i le kamupani a Ausetalia. Peitai na toe logo a’u e lo’u ofisa o le MWTI, o lea e iai le savings ii i le poloketi lea a le Waterfront lea e iai i le taimi lenei, manatua o le poloketi lena e vaai e a’u o le minisita. O la e iai le savings o le a toe faafoi ae sili le faaaogā. Ia ou taofia loa le Airport Authority. Fai atu loa i lo’u ofisa, taofi la le tupe lea e aumai i o i le Pulega o le Malaevaalele, ae faaaogā le tupe lea i le savings. Ia lea la na fatino ai le faasologa o le faatauga o le taavale lea. Manatua foi Autagavaia, o mea ia e leai ma se mea na ou lotea, na lote uma lava e le finance a le MWTI, ma mulimulitai ai mea foi ia o procurement guidelines a le Malo. Na la sa faatino uma ia ma pay ai loa le taavale. Ua uma ona pay le taavale, ae pay la le paleni lea na deposit e le malaevaalele le 50 afe ae toe pay e le ofisa o tupe le 50 afe agai i le malaevaalele, ua uma la ona faatino mea lena. Manatua la, e lē vālea le ofisa o tupe ua ta alu atu ma lata taavale a ta ita, ae nofo ma totogi mai i se siaki o tupe o le Malo…..
……O la e manino lava mea uma. Ae pei ua faapena lava le tulaga o le taufaaleaga o le toeaina lea o Tuilaepa; ia ae manatua foi o le mea lea o le Itu agai, ua galo a ona ou tago e fai se aoga a le aualii lea. O le mea lea o le Itu agai, a e tetee, ia e tetee constructive lau tetee, ia iai se point. A o le mea la lea ou te vaai atu i le Itu agai, e lē tetee foi lele constructive ae tetee taufaaleaga. Ou te iloa lava e tiga tele lenei mea o le to’ilalo ma le faia’iga; pei e maasiasi i le mea. O la’u ga tilotilo i ai i le toeaina; ma e oo mai le taimi lenei, e tele tuua’iga ma ana mea amata mai lava i le container whiskey lea foi la na tuua’i ai foi a’u. Lea foi la na ou po po faalelei ai i ia latou mea na. E oo i mea ia e faalumaluma ai foi i lo’u igoa lea sa ou sau ai i lo’u itumalo i Sale’aula, ia sa ou lagona lava le loto faamagalo. Ae Autagavaia o le mea lea, ou te lē toe solomuli ai leaga e matuiā, leaga ou te popole ma ou magumagu i le tofi minisita a le atunuu lea e saofai ai Olo i luga.’
Ua faailoa foi e le minisita o galuega tetele e iai isi matagaluega a le Malo o loo faapipii ai numera poo number plate e private ma e mafua ona o taavale o loo faatupe i fesoasoani o poloketi mai fafo a ia matagaluega e pei foi o le poloketi o le waterfront o loo i le vaaiga a lana matagaluega, lea o loo faaaogā ai tupe o lea fesoasoani a Niu Sila e faatau ai le pikiapu o loo ia faaaogā.
O aiaiga o loo iai o lea faiga a mae’a le poloketi ona faato’ā tuu aloaia lea i le Malo ma faapipii ai le numera le number plate a le Malo. Ua faailoa foi e le Minisita e taunuu atu le faigamalo ua iai nei e 13 taavale fou ua tapena e faatau mai fafo mo le kapeneta ae peitai na latou taofia le faatauina o ia taavale ona e taugata e $300 afe tala i le taavale e tasi.
