E leai se tagata Pasefika i Niu Sila ua talosaga mo le euthanasia poo le ioega e mafai ai ona faia le tui oti o le gasegase ua maua i se ma’i ua leai se fofo.
O le tulafono lenei o le End of Life Choice na amata aloa’ia mai i le faai’uga o le tausaga ua alu, ma e oo mai i le faai’uga o Mati o le tausaga nei e to’a 66 i latou na faatalosagaina.
I lea aofa’iga o le 79% o papalagi, 6% o Maori, 2% o tagata Asia ma le 13% e le’i finagalo e faailoa o latou tagatanuu.
O faamaumauga nei ua sau ma le lipoti fou mai le matagaluega a le soifua mālōlōina, ma o ni faamaumauga e lē faate’ia ai pe a toe tepa i le to’atele o tagata Pasefika latou te le’i lagolagoina le faatalanoaina o lenei tulafono a o le’i faapalotaina i le palota tele.
O le lipoti foi o loo ta’ua mai ai o le 73% o tagata maliliu mai lenei tulafono sa faia lava lea i fale o aiga, ae 84% o gasegase sa filifili e faia e foma’i poo tausi soifua le vailaau lea e uma ai le soifua nai lo le faia lava e i latou.
