E lei maua lava le toatasi lea na leiloa mafua mai ina ua sa’e le vaa sa o ai i Manukau Harbour i Aukilani.
O lea ua lua vaiaso talu ona tupu lenei faalavelave, ma o ananafi na faailoa mai ai e leoleo le suafa o le toatasi ua maliu, Gemma Ferregel, 39 tausaga le matua.
O le toatasi o loo sailia pea o le alo o le tina ua maliu, Ryder ma e 10 tausaga lona matua.
I finagalo o le aiga faanoanoa tauala mai leoleo, pau le manaoga ia foi mai le atalii ma ua faafetaia foi le komiunti faapea auaunaga eseese o loo fesoasoani i sailiiliga.
Tuufaatasia tala fou ua silia ma le $63,000 tupe ua maua mai sailiga tupe o loo faia ina ia mafai ai pea ona faaauau sailiga o le atalii.
