Ua faaalia le finagalo o le Afioga i le Tamaitai Palemia, Fiame Naomi Mataafa i le Palemene i le vaiaso nei i le mataupu e faatatau i leoleo e auina mai fafo mo le faatinoina o suesuega i mataupu tuga aemaise lava i mataupu e aafia ai nisi o sui faipule.

O le afuaga o le tali mai a le Tamaitai Palemia ina ua tulai le sui faipule o Safata Muamua ma fesiligia le tulaga ua iai le mataupu lea sa ave iai le faamuamua a lo tatou malo.

O le fesili a le sui faipule e foliga ma sa tuuina atu i le Sui Palemia peitai o loo malaga Tuala Tevaga Iosefo Ponifasio.

Na ta’ua e le sui o le mataupu i ni leoleo e aumai mai fafo e faia suesuega i le mataupu o loo laualuga iai faitioga ma o loo aafia ai nisi o Minisita ma sui faipule o le maota, ma ua mae’a faailoa atu o loo ave iai le faamuamua a le malo.

E ui e lei faailoa tino mai le mataupu peitai sa tuuina mai lava le tali a le Tamaitai Palemia. 

Saunoa Fiame e lē tau aumaia ni leoleo mai fafo o loo faaaogā lava a tatou leoleo atoa ai ma leoleo o atunuu i fafo o loo galulue faatasi ma le Matagaluega o Leoleo iinei.

I le tausaga ua mavae sa fesiligia ai e a tatou tala le sui o le malo o Ausetalia i lea lava foi tulaga ma ta’ua ai i lea taimi e lē o iai se tulaga faapea o iai, ae o loo sauni lava Ausetalia e tali mai i soo se manaoga e manaomia ai se fesoasoani.