E teena e ta’ita’i o le Pasefika se atugaluga o le malo o Niu Sila i le faamatuu o le sa’olotoga e malaga mai ai tagata Pasefika i Niu Sila e aunoa ma ni visa, i le manatu faapea o le a matuā sau soli ai tagata Pasefika i Niu Sila, pe o le a oese mai ai foi le to’atele o tagata mai o latou atunuu ae leai nisi e nonofo e atia’e le tamāoaiga o atunuu i le Pasefika.
I se faatalanoaga a le PMN ma le afioga i le Komesina Maualuga o Samoa i Ueligitone, Afamasaga Faamatalaupu Toleafoa, na ta’ua ai e Afamasaga, o loo lagolagoina atoatoa le faigāmalo a Samoa lenei faama’ite ua taulamua ai le afioga i le Faaaloaloga ia Anae ma i latou uma o le komiti a le Pacific Justice ma tagata uma o loo lagolago.
O le atugaluga o Niu Sila na faapea mai Afamasaga e lē sa’o lena manatu; o aiga o le Pasefika e ese foi latou.
Pau lo latou mana’oga ia faafaigofie le faimalaga mai e asiasi i aiga i Niu Sila aemaise i taimi o ni faalavelave e tula’i faafuase’i, ae o le agaga lava ia o tagata Pasefika e toe foi lava i o latou atunuu.
E pei o Samoa, e fiafia e malaga mai e tafafao ma asi aiga, ae o loo tele o latou tiute ma matãfaioi i afio’aga i Samoa e tāua ia latou ma e toe foi e faatino.
O le afioga i le minisita o le va i fafo, Vaovasamanaia Winston Peters ma le New Zealand First lea na latou talia lelei ma lagolagoina le mau a le Pasefika e pei ona momoli atu iai i le aso ananafi, ma o ia o le a faaooina atu lena mau i le Parliament Petitions Select Committee.
Na faamautinoa mai e Peters le lagolagoina e lana vaega faaupufai o māfua’aga tāua o le talosaga, ma ia ta’ua ai, o suiga ina ia mafai ona faimalaga mai i le atunuu mo ni taimi pupuu e aunoa ma le moomia o ni visa, e mafai ona fai e aunoa ma le faia o se tulafono fou toe teuteu.
Puna o Faamatalaga: https://pmn.co.nz/read/political/samoa-backs-visa-free-travel-as-pacific-leaders-reject-mass-migration-fears
