E leai se maliega ua sainia e Samoa ma le Malo o Saina ina ua afea le atunuu e le Minisita o le Va i Fafo o lea Malo i le faaiuga o le vaiaso na te’a nei.
Ua faamautu atili le leai o se maliega na sainia e pei ona salalau i nisi lipoti i atunuu i fafo ina ua faailoa i lipoti mai Fiti le finagalo o le taitai o lea Malo le alii Palemia o Frank Bainimarama ua ia faailoa ai le tutū faatasi o taitai o Malo o le Pasefika i le lē avaga gofie i ni feagaiga poo ni maliega tau puipuiga ma Saina poo nisi folafolaga a lea Malo, ae faaauau pea ona tausia sootaga lelei ma faapena foi ona faaauau fesoasoani a lea Malo o loo maua e atunuu taitasi e faapei foi o fesoasoani ma meaalofa o loo maua mai i isi Malo tetele o loo faipaaga ma atunuu o le Pasefika.
I le feiloaiga ma le tamaitai Palemia le afioga Fiame Naomi Mataafa i le amataga o lenei vaiaso na tuusa’o ai se fesili mo sona finagalo i lona tulaga o le Minisita o le Va i Fafo e tusa o ia lipoti ma le malaga mai i Samoa o le Minisita o le Va i Fafo o Saina. Na faailoa e le afioga Fiame Naomi Mataafa o le Aso Gafua o le vaiaso lenei sa fono ai i luga o fesootaiga televavave taitai o Malo o le Pasefika e faatalanoa le mataupu.
Le afioga i le Palemia o le Minisita o le Va i Fafo o le Malo Samoa afioga Fiame Naomi Mataafa.
