E lē o iai se finagalo o le Palemia o Niu Sila i le tatala o le avanoa i tagata lautele e faaali finagalo ai i le mataupu o loo faia ai pea nei iloiloga pe tatau ona alu Niu Sila i le lio a le Aukus pe leai.
O le aso ananafi na tulaueleele manuia ai Christopher Luxon i Manila i Filipaina ma o le atunuu mulimuli foi lea o lana faigamalaga i Asia i Saute i Sasae, ma a o talanoa mai ai mai Filipaina ananafi i lenei mataupu na mafuli lana talanoa i tapenaga ma iloiloga o loo faasolo pea nei.
Na saunoa Luxon, o se mataupu e fou ma e tatau ai i sui faitulafono ona lotea ma o le faamuamua lava o le auiliili uma o itu ma avanoa e ono mafai ai e Niu Sila ona ofi i le Aukus i lalo o le Pillar lona lua.
O le Aukus poo le faigafaapaga a Ausetalia, Amerika ma Peretania, o se tasi lenei o maliega na talanoa i le uluai feiloaiga a Luxon ma le Palemia o Ausetalia Anthony Albanese, ma o le puipui lona lua lea o loo agai iai le vaai a Niu Sila.
Puna o Faamatalaga: NZ politics live: PM Christopher Luxon won’t commit to consulting public on Aukus | Stuff
