O le Ipu o le lalolagi i le taaloga soka i le itupa o tamaitai mo le 2023 o le a amata aloaia i Aukilani i le asō lea o le a muai fetaui ai Niu Sila ma Norway.
O le taamilosaga tele lenei o lea taaloga ua faia mai i le Oceania e aofia ai ‘au e 32 mai vaega eseese o le lalolagi.
E na o Niu Sila le sui o le Oceania ae o loo iai pea le sao o le Pasefika i nisi o atunuu e ala i le au taaalo o loo iai e iai sootaga ia Samoa, Papua Niu Kini ma Fiti.
O le isi o i latou ia o le tamaitai o Mary Fowler mai Ausetalia, o le tamā e mai Aialani ae o le tina o le Papua Niu Kini.
O isi o Grace Jale o lona tuaa tamā o le Fiti ma Malia Steinmetz ua ta’ua o lona tina o le Samoa.
Sa faamatala e le tamaitai o Malia i le RNZ o le taumafai e koneti ma lona tupuaga i Samoa o se tulaga tāua lea mo ia ma o se itu e mitamita ai le iloa o lona tupuaga ma aiga.
