E ui i le fesoasoani a le malo ua faailoa mai ananafi mo iunivesite, e le o suia ai le vāea a iunivesite tetele e lua i totonu o le atunuu.
E $128 miliona lea na faailoa mai e le malo ananafi o le a faamatuu mai se’i fesoasoani ai i iunivesite a o pa’ū le fuainumera o fanau aoga ulufale, ma o se auala foi ia faasao ai avanoa faigaluega o le faitau selau o tagata galulue i iunivesite lea ua faatalanoa o le a vāea.
Peitai mai iunivesite a Victoria ma Otago, e le o suia ai le vāea na ta’uta’u.
Fai mai Victoria o se fesoasoani e le o mafai ona faatupe uma ai itu o loo moomia e le iunivesite, lea e le na o le aufaigaluega.
Ae mai le iunivesite o Otago, e le o iloa pe fia avanoa faigaluega o le a faasao mai i le vāea na fuafua ona o le sao o le malo ua faailoa mai, ma i le taimi nei o le a faaauau pea ona tatala le avanoa ia i latou e fia o i le vāea poo le voluntary redundancy.
O le isi itu e faigata ai, o le fesoasoani ua faailoa mai e amata aoga mai le tausaga fou, peitai o loo moomia vave e iunivesite se fofo o le faafitauli i le taimi nei lava.
