O le faalapotopotoga mo le Toomaga mo e Puapuagatia (SVSG) o loo tumalosi i le faia o polokalame ma talaiga e tetee atu ai i le sauaina o fanau ma tamaitai faapea ma tinā o le atunuu ma ua aupito telē lana vaega tupe ua maua mai le $1miliona tala o le faasoa a le malo i Faalapotopotoga Tumaoti o loo faia foi lo latou sao i le taofia o nei sauaga.
E afa miliona pe $500,000 ua maua e le Toomaga mo e Puapuagatia mai le $1miliona ua faasoa ae o isi Faalapotopotoga Tumaoti e 11 na o latou maua le $20,000 tala i le Faalapotopotoga e tasi.
O ia seleni o le a faatino ai polokalame ma taumafaiga uma e taofia ai sauaga e le gata o le tino a’o le mafaufau aemaise o sauaga i feusuaiga solitulafono ua aafia ai fanau teine laiti.
Ua faaalia e le taitai o le malo o se tasi lea o manulauti o fuafuaga faagasolo i le naunau o le malo ia faamalosia aoaoga ma polokalame e faasaga tau atu ai i soo se sauaga i tina , tamaitai ma fanau.
