O le aumau i fafo o nisi o tama fanau o le afioaga o Vailele ona o sailiga manuia auā aiga ua susu’e ai le faamalama o le Isaraelu moni auā e “E lele foi le toloa ae ma’au i le vai” ona o le fia fesoasoani i le tausiga o tamā ma tinā matutua i Mapuifagalele.
Ua savalia nei le 4 tausaga talu ona faavae le mafutaga a ia tama fanau o Vailele o alala i Ausetalia, Niu Sila ma Amerika ma faaigoa ai o le V.A.N.Z.A. ua o latou foai ai se seleni tele e $20,000 tala i Tamaitai Sā o loo aumau ai i lea nofoaga.
O le afioga i le sui taitai lagolago a le Puleaga Akiepikopo Samoa Apia afioga Patele Pio Galumalemana o se tasi foi o tama fanau a Vailele na ia molimoli le meaalofa i Tamaitai Sā ma ia faailoa ai o le V.A.N.Z.A o se mafutaga na mafua ona faavae ona o le faama’i Koviti19 ma ona aafiaga i tagata e saili ai e ona sui auai fesoasoani mo le afioaga a’o lea ua agalelei nei mo le tausiga o tinā ma tama matutua i le nofoaga i le Mapuifagalele.
Taua e le afioga Patele e le na’o se Ekalesia e tasi e omai ai sui o lea faalapotopotoga ae o sui o Ekalesia eseese mai le afioaga o le manatu maualuga ina ia toe maua mafutaga e pei ona ola a’e ai i Vailele.
Na talia ma le agaga faafetai e Tamaitai Sā o loo iai le vaaiga o tinā ma tamā matutua i Mapuifagalele lenei foai taua ma o le a faaaoga lea seleni e fesoasoani ai i vaega e moomia e le au matutua.
