E 36 tagata Ausetalia ma o latou aiga na aveina ane e se vaalele mai Sudan i le po anapo i se malaga laveai a le Royal Australian Air Force.

O le minisita o le puipuiga a Ausetalia, Penny Wong ua ia faamaonia mai lea  faamatalaga i le asō ma ia faailoa ai foi e silia ma le 190 tagata Ausetalia ma o latou aiga na mafai ona agai ese mai ma Sudan lea o loo vevela ai nei fetauiga ua savali atu i le tolu vaiaso.

Fai mai sa iai foi ma nisi tagata sitiseni mai isi atunuu na ono aveina ane faatasi i le malaga lea a le ea fosi a ausetalia ma o loo faaauau pea ona feutagai ma isi tagata Ausetalia o loo lesitala i le ofisa o le malo o loo i Sudan. 

Na faamaonia mai e le ofisa o le va i fafo a Ausetalia o loo iai pea i se tulaga matuai lamatia le atunuu o Sudan, i le itu tau le puipuiga ma e tatau lava ona silasila lelei i vaega o femalagaa’iga ia alofia lea faaitu.

O le aso 15 o Aperila na amata ai vesiga i le va o le ami a le atunuu ma se kulupu ua faaigoa o le Rapid Support Forces ma ua silia ma le 436 tagata ua maliliu ai ma le silia ma le 1,200 ua manunu’a talu ona amata ia fetauaiga.