O le lipoti lata mai a le faletupe o atina’e o Asia poo le Asian Development Bank le ADB, ua faailoa ai le avea o faiga faavae a Samoa i le toe autaluina ma toe faatulaga le pulea lelei o faalapotopotoga tumaoti a le Malo poo State Owned Enterprises ma faataitaiga lelei poo le role model, mo isi atunuu o le Pasefika.
O le faamuamua a le Malo o Samoa i le toe faataotoina o alāfua e limataitaiina ai le pulea lelei o faalapotopotoga i le valu tausaga ua mavae, ua faaalia e le faletupe i lana lipoti, ua maua ai se fata poo se platform e sili ona lelei i le tuuina atu o auaunaga ma tautua a faalapotopotoga tumaoti o loo pulea e le Malo.
O le taunuuga o le lipoti mai se sailiiliga a lea faletupe faavaomalo, na taulai i atunuu e iva o le Pasefika ua aofia ai Fiti, Kilipati, le Atu Malesala poo Marshall Islands, Palau, Papua Niu Kini, Solomona, Tonga, Vanuatu ma Samoa.
O le fono i Samoa a sui o Malo, pisinisi, ma faalapotopotoga o loo ofoina fesoasoani i le lautele o tagata poo civil societies na talanoaina ai le lipoti mai le sailiiliga a le faletupe o atina’e o Asia.
Na faaalia e le sui sooupu o lea faletupe i le fono i Apia, e tatau i le Malo o Samoa ona faaauau pea le ofoina o avanoa e auai ai pisinisi tumaoti i auaunaga a faalapotopotoga tumaoti o loo i le vaaiga a le Malo.
O se itu tāua tele lea e mafai ai ona galulue faatasi ma unaia ai tulaga lelei e mafai ona tali atu ai i suiga o le tau.
O le sailiiliga na faia na aofia ai tausaga mai le 2015 i le 2022 ma na iloa ai, le lelei o tupe maua faasili a faalapotopotoga tumaoti a le Malo na aoina ae faaletonu i le toe maua o a latou tupe faavae poo capital cost.
Mo Samoa lava ia i ana auaunaga tau faalapotopotoga tumaoti o loo pulea e le malo na siitia i le tasi le pasene ma le 0 tesimale tasi pasene tupe maua i luga o tupe faafaigaluega i le va o le tausaga e 2016 ma le 2019, ae na matua aafia i ni faaletonu lea tulaga i le va o le tausaga e 2010 i le 2015.
I fesoasoani faaauau a le faletupe o atina’e o Asia mo Samoa, ua mae’a nei ona faamautu se foai tupe e 10 miliona tala Amerika mo galuega a le tatou Malo e tauala mai i fesoasoani a lea faletupe i manaoga o Samoa i taimi o faalavelave faalenatura ma aafiaga o le soifua maloloina o tagata, i faamai pipisi e pei o le Koviti-19.
O le tausaga e 2017 na agavaa ai Samoa i ia fesoasoani a le faletupe, e pei ona sa faamatuu muamua mai ai se vaegatupe e tusa ma le 6 miliona tala Amerika.
O aafiaga foi o le tatou atunuu ina ua pesia le lautele o tagata i le faamai Koviti-19, na aumai ai foi se isi foai poo se grant e 10 miliona tupe Amerika.
O ia vaegatupe na tuusao e lagolago ai fuafuaga tau tupe a lo tatou Malo mo le tausaga 2020, 2021 ma le 2022.
