Ua folasia nei i se tulaga faalauaitele le faatoesega mai le Ta’ita’ifono o le komiti faatonu o aoga a Felela Malisi i Samoa le afioga Tuatagaloa Aumua Minug Leung Wai, e mafua i le vevesi na tulai mai i le taamilosaga su’e siamupini o le lakapi a Kolisi maualuluga i Samoa, lea sa faia i le malae o le Kolisi o Sagato Iosefo i Alafua i le aso 3 o le masina nei o Me.
I le faatoesega tusitusia ua ta’utino ai le ta’ita’ifono o le mea moni ua sopoutu nisi o fanau a’oga o le kolisi, ma o se lape lea i le Alii Felela Pule vasega o faiaoga, ae o se faaletonu foi lea o le ta’ita’ifono ma le komiti faatonu o aoga faapea le aiga Felela Malisi i Samoa.
E pei ona silafia o lea vevesi na tupu i le taimi o le taaloga su’e siamupini a le kolisi o Sagato Iosefo ma le Kolisi o Amoa i Savaii lea na sailia ai le manumalo o le lakapi i le vaega o alii i le matutua e i lalo o le 18 tausaga poo le Under eighteen.
Na manumalo le Kolisi o Amoa ma tuua’ia ai le laufali, ma o le tasi o itu ogaoga o le vevesi na amata e nisi o le autapuai o le ta’ei o ni vaega o le tioata tele o le taavale o le van a le Lakapi Samoa.
“I le agaga maualalo matou te faatoese atu ia i latou uma na aafia i lena aso, aemaise le Kolisi o Amoa ma lana tapuaiga ona o amio lē taupulea a nisi o tama aoga mai Sagato Iosefo.
“E momoli atu foi vai malu i pu’ega i lau tapuaiga Samoa ona o aga lē tau tamalii a nisi o le fanau a’oga”, o se tasi lea o vaega o le faatoesega tusitusia mai le ta’ita’ifono o le Komiti faatonu o le pulega o aoga a le Felela Malisi i lo tatou atunuu.
Faaalia e Tuatagaloa i lea lava faatoesega o upu a le atunuu o le sala a le tautai e totogi, ma e talitonu le komiti faatonu e aogā le faasalaga e toe poupou ai le ola a’oa’oina o le fanau, ma toe faamalosia ai le amio pulea aemaise e tapu’e ai le sipili Malisi o tama aoga o le Kolisi o Sagato Iosefo.
O lea sipili Malisi o le loto maualalo, alofa ma le faaaloalo.
E 4 tausaga ua faasala ai lea Kolisi a le Ekalesia Katoliko e lē toe auai i le taamilosaga lakapi a kolisi maualuluga.
Ua faailoa e se molimau faatuatuaina o le umi foi lea o tausaga e lē toe auai Sagato Iosefo i isi tausinioga tau taaloga a aoga i le atunuu e aofia ai ma taaloga afeleti.
O le faaiuga lea a le komiti o taaloga a kolisi ma aoga maualuluga uma i Samoa.
