I le faalauiloa ai o lē ua tauaveina le ‘auta’ito’afitu a alii le Manu Samoa, a o lea foi ua faalauiloa faalaua’itele mai foi le sui o le a avea ma faia’oga ulu o le ‘auta’ito’afitu a tamaitai le Manusina.
Ma ua faamaonia mai ai e le Lakapi Samoa e ala i se pepa o faamatalaga le filifilia ai o le tama’ita’i o Filoi Eneliko e na te tau’aveina lea tofiga, aemaise lona ta’ita’iina o le ‘au mo le taamilosaga o le Oceania i le masina o Tesema.
Ta’ua i pepa o faamatalaga na filifilia Filoi Fatima Eneliko e se’ei mai i lea tulaga i le mae’a ai o se iloiloga ma fautuaga ua tuuina atu e le Komiti o Iloiloga, o i latou o loo gafa ma le galuega faatino e su’e avanoa atu ai le Manusina i le Olimipeka (Review Panel of the Manusina 7s Olympic Qualifier) ma aloa’ia ona talia e le Lakapi Samoa i lenei masina.
Faaalia le fiafia tele o le Pule Sili o le Lakapi Samoa, Faleomavaega Vincent Fepuleai i le faalauiloa ai o le tamaitai ia Filoi.
Na ia faasoa foi, le telē o lona faatuatuaga ma lona talitonuina o Filoi ma lona ta’ita’iga o le ‘auta’ito’afitu o le Manusina, aemaise taumafaiga a le ‘aulakapi mo so latou avanoa i le taamilosaga ua ta’ua o le 𝑪𝒉𝒂𝒍𝒍𝒆𝒏𝒈𝒆𝒓 𝑺𝒆𝒓𝒊𝒆𝒔 2025.
Faamauina le agaga faafetai ma le fiafia o le tamaitai o Filoi i le amana’ia o ia mo lea tulaga, ma na ia faasoa o le a ia galue malosi ma le faamaoni i tapenaga ma taumafaiga uma mo le taamilosga ia Tesema.
Ua filifilia lea alo o le atunuu e na te tauaveina le tofiga o le faia’oga ulu mo le taamilosaga o le Oceania 7s, ae e lē o mailoa le lumana’i i le mae’a o lea taamilosaga ia Tesema, faapea ai ma taumafaiga ina ia saofagā o se tasi o ‘au e taaalo o ni ‘au ua ta’ua 𝒏𝒐𝒏-𝑪𝒐𝒓𝒆 𝒕𝒆𝒂𝒎 i le taamilosaga ta’ito’afitu 𝑪𝒉𝒂𝒍𝒍𝒆𝒏𝒈𝒆𝒓 𝑺𝒆𝒓𝒊𝒆𝒔 2025.
I le tala’aga o Filoi Fatima Eneliko, o se sui tuai o le ‘au tele o le Manusina ma le ta’ito’afitu, ma o sē na faauluulu iai le pulega o le polokalame ma a’oa’oga o le taaloga lakapi mo tamaitai i le atunuu (Academy Manager for Women’s Rugby at Lakapi Samoa) ma o se faia’oga lagolago i le vaega o le backs mo le ‘au a le Manusina.
E na te umiaina faailoga taualoa i tulaga tau faia’oga lakapi i le lalolagi i lona Vaega 3 poo le World Rugby Accredited Level 3 Coach.
O ia o le ulua’i tamaitai na avea ma faia’oga ulu o le ‘au a alii i Upolu i le taamilosaga o le Suegasiamupini o le taaloga lakapi a le Lakapi Samoa High Performance (Lakapi Samoa Championship Tournament).
E lē gata na ia mauaina ia avanoa i totonu o le atunuu ae na faapena foi na avea Filoi ma faia’oga lagolago mo le Backs mo le ‘au malosi a tamaitai o le Brumbies i Ausetalia i le taamilosaga o le Super Rugby mo le 2 tausaga.
Ua faamauina le telē o le sao a le tama’ita’i o Filoi i le taaloga mo a’oga maualuluga ina ua avea o ia ma ulua’i tamaitai e na te ta’ita’iina le ‘au a le a’oga maualuga a Sagato Iosefo, lea na sola ma le siamupini o le taamilosaga lakapi i le tausaga 2014.
O loo iloga foi lea tamaitai i ana taumafaiga i nisi o taaloga e pei o le lakapi pa’i poo le Touch Rugby lea na fai ai o ia ma sui o le atunuu i le ‘au a Samoa lea na manumalo i pine auro i taaloga o le Pasefika i le tausaga 2007, 2015 ma le tausaga 2019.
O Filoi Fatima Eneliko e mai nuu o Sinamoga ma Taufusi.
Puna o Faamatalaga: https://www.facebook.com/manusina7s
