O le tausaga 2022 ua faamauina le maualuga ai o le tuuaofa’iga o tupe faameaalofa mai le tufatufaga a le Faalapotopotoga o le Lumanai Manuia o Tagata le NPF, ua sasa’a atu i le tamaoaiga o le atunuu e ala i le au fai saofaga.
E 66 miliona 700 afe tala le aofa’iga atoa pe a tuufaatasi le pasene o le meaalofa o le aso fanau 50 tausaga o le faalapotopotoga na tala ia Aperila le isi vaega, ae tala ia Tesema o le tausaga nei le isi vaega o loo totoe, ma le 3 tesimale 2 pasene o lana meaalofa masani faaletausaga le dividend, ua amata maua i le Aso Faraile le aso muamua o lenei masina fou o Iulai.
O se ulua’i taimi lenei ua maua ai se faamanuiaga a le NPF mo le au fai saofaga e silia i le to’a 40 afe tagata faigaluega, ua ave uma i ai e aunoa ma le ave o se isi vaega ia latou teugatupe.
Mulipola Anarosa Ale Molioo: “Atonu o faamanuiaga tāua ia mo le tatou aufaisaofaga, ona ua manatu foi le afioga i le ta’ita’ifono aemaise foi le tatou komiti faatonu, le afioga i le alii pule, o le pulega a le tatou ofisa o le NPF, ua alagatatau ona tuuina atu nei faamanuiaga aemaise lava i lenei taimi e tāpena ai tatou. E lē o toe po malaē, o le aso muamua o Aokuso lea e fuafua e tatala atu ai le tatou atunuu i le malaga mai foi o tagata tafafao mai fafo, ia amata ai foi ona malaga mai o tatou tagata ua leva ona fia oo mai i totonu o Samoa. Lona uiga e oo atu i le taimi na, ia ua lava tāpena lo tatou atunuu ma ua maua foi le tamaoaiga e o tatou au faisaofaga e faatino ai galuega uma ina ia faapena pea ona faaauau pea le auaunaga. So e momoli le agaga o le faafetai, o le tatou au faisaofaga auā ana lē seanoa foi lo outou sao, e lē mafai ona faatinoina foi nei faamanuiaga.”
Le afioga i le Minisita o Tupe e aofia ai ma le vaaia o le NPF, le afioga Mulipola Anarosa Ale Molioo, i le faalauiloaina o le pasene faameaalofa faale tausaga a lea faalapotopotoga a le Malo. Faaalia e le Ofisa Sili o le pulega o le NPF le tofa Pauli Prince Shuren, o le 3 tesimale 2 pasene o le meaalofa faaletausaga sa faatalanoa e le Komiti Faafoe e ta’ita’ifono ai le Ofisa Sili o le Matagaluega o Tupe a le Malo, ma logoina ai foi le Minisita o tupe.
