O le alii Samoa ia Bundee Aki o le kapeteni lea o le ‘au a Aialani lea na molimoli aloa’ia le ofu taalo Aialani numera 11 (jersey) i le ogatotonu o le malae a o loma ai le la taaloga ma le Maori Olo Peleki o se auala e faaaloalo ai pe manatua ai le alii taalo ia Sean Wainui lea ua fai i lagi le folauga.
E pei ona silafia o Sean Wainui o se tama taalo logologoa mo le Maori Olo Peleki faapea le ‘au a le Chiefs na maliu faafuase’i i se faalavelave tau taavale i le tausaga na te’a nei.
I le mae’a ona tauaao atu e Bundee Aki o le ofu taalo na faia ai loa le siva tau poo le haka a le aulakapi a Maori Olo Peleki o se latou auala lea e faaaloalo ai ia Sean Wainui aemaise lona aiga.
O se vaaiga mata’ina, e lē gata o le faaaloaloga mo le uso taalo, ae o le faatino ai e se alo o Samoa o lenei tu faaaloalo mo se tasi sa la taaalo faatasi i se isi ‘au e ui o lea ua ese se ‘au ua taalo mai ai i se isi itu o le lalolagi, o se pine foi lea o le maualuga o le amanaia o sona leo i lea itu o le lalolagi ua taalo mai ai.
O le tina faanoanoa ia Paige ma le la fanau to’alua sa taulimaina lenei ofu taalo ma ia faafetaia ai ‘au uma e lua mo lea faaaloaloga.
