Ua talia nei e le faamasinoga le talosaga a leoleo e toe faaui uma i tua moliaga e fā o se tamā e 49 tausaga le matua, ina ua toe sui le faamatalaga a le teineititi na faia tuua’iga ma ia faailoa i leoleo e pepelo uma vaega na ia ta’ua i lana faamatalaga muamua na faia ia Setema o le tausaga na tea nei.

O moliaga e fā a leoleo e aofia ai solitulafono o le pule lē uma, peitai o le talia ai o le talosaga a loia a leoleo e toe ave i tua moliaga uma, ua faatonuina ai e le faamasinoga leoleo ina ia faia se suesuega, faasaga i le teineititi ona o lana faamatalaga na faia i le vaiaso na tea nei ina o le a valaau molimau, e pepelo uma tuua’iga sa ia faia i lē na molia o lona tamāfai poo le stepfather.

E iai nisi mataupu faapenei i ni tausaga ua tuanai na tulai mai ai foi tulaga faapea, o le sauni o leoleo o le a tuuina atu mau e lagolago ai ni tuua’iga faapea, ae suia le faamatalaga a le teineititi na faauluina le tagi. 

O le suesuega a leoleo o le a agai i le teineititi 14 tausaga ua tautino na pepelo, afai ae maua ni mau e lagolago ai lea tulaga e ono molia i le solitulafono matuia o lona pelogia o leoleo ma le faamasinoga.

O le teineititi sa i le vaaiga a le Toomaga peitai na sola i tua ma toe foi i lona tina moni sa nonofo ma lē sa molia.