O loo tālia e se tagata faigaluega i totonu o le Lakapi Samoa se tali atu a leoleo i lana tagi ua faaulu faasaga i se gaioiga a se sui o le Komiti Faatonu o le Lakapi Samoa, e pei ona tuua’ia e lea tagata faigaluega le tago atu o lea sui o le komiti ma kola lona ofu ma toso faatātā o ia, faapea le lafo atu o se upu masoā ia te ia i totonu o le fale kalapu o le JT i Vaimea.
O lea tagi i leoleo ua ave ai foi ma se tusi faaseā a Andrew Fusi Williams i le ta’ita’ifono o le Komiti Faatonu o le Lakapi Samoa ua faamatala ai lona le fiafia i le gaioiga na faia ia te ia e lea sui o le Komiti Faatonu.
O le a taofia le faailoaina o le suafa o lea tagata se’i tālia su’esu’ega a leoleo e iloa ai pe iai ni moliaga.
O Andrew o loo galue o se tagata e feagai ma polokalame o le atina’e o le lakapi poo se rugby development officer.
Ua ia faamatala i lana tusi faaseā ua ave i le ta’ita’ifono o le Komiti Faatonu le susuga Tuilaepa Lupesoliai Sailele Malielegaoi, ina ia silasila toto’a i le gaioiga na faia ia te ia pe o ni amioga ia e faia e ni sui o le komiti, aemaise o loo lotolotoi i tonu fai o le atina’e o le taaloga lakapi i le atunuu.
O le sui o le Komiti Faatonu o loo faatūtū iai le faaseā o se loia ma o se sui o le sosaiete a loia i Samoa.
