E 28 faaseā faatatau i le aufaigaluega a le Oranga Tamariki poo le matagaluega mo tamaiti ua tuuina atu nei i leoleo ina ua mae’a le iloiloga sa faia e faatatau i le auaunaga lea talu mai le tolu masina talu ai.
O le iloiloga external rapid review o Oranga Tamariki na amata ia Iuni ina ua faamalolo le aufaigaluega e toaono e mafua mai i tuuaiga o amioga lē pulea.
E toafā isi o le aufaigaluega o loo aofia i se video o tagata talavou ua faaoso e fusu i le masina o Iuni, mulimuli ane, aveesea isi tagata faigaluega e toalua mai le nofoaga i le mae’a o tuuaiga e faatatau i amioga lē talafeagai ma uiga matagā.
Ua faailoa e le Ofisa Sili o le Oranga Tamariki o Chappie Te Kani ua ia taliaina iuga o le iloiloga ma ua maua foi e latou faaseā e 46 e agai i tuuaiga o le aufaigaluega ma mafatiaga i tagata talavou ma o le 28 la o nei faaseā ua tuuina sa’o atu i leoleo ma e oo mai i le taimi nei ua toatolu le aufaigaluega ua mollia e leoleo i lalo o le Crimes Act 1961.
