Ua faasala nei i le to’ese mo le 3 tausaga ma le 3 masina le alii o Abdul Ahmadi, i lona tuufaatasia ai o galuega e avatu ai le tele o taavale gaoi i atunuu i fafo.
I lipoti mai le Star News na faamauina ai o lenei tagata o se alii Afghanistan ma sa sulufa’i mai i Niu Sila, ma o lona aumau ai i totonu o le atunuu na ia amata faatino ai sana pisinisi e aga’i lea i le talepeina o taavale – dismantling yards i Kalaiesetete ma Ueligitone; o pisinisi mautū ma aloa’ia i totonu o ia faaitu.
E faapea ua aafia lona tagata ma lana pisinisi ina ua ia faia faalilolilo le talepe o le oo atu i le 38 o taavale gaoi, ma le agaga e tufatufaina atu ma avatu i atunuu i fafo.
Māua, e $800,000 le tauaofa’i o taavale uma nei na faatino iai gaioiga solitulafono.
Ta’ua i faamatalaga ma lipoti na amata faatino e lē ua faasala nei, ia gaioiga mai le va o Tesema 2023 aga’i le masina o Aokuso 2024.
Faamauina o nisi o nei taavale na maua atu lava i totonu o nai itula a o le’i avatu e faamomoli i atunuu i fafo.
Na maua e leoleo lenei faatinoga ina ua alu sa latou osofa’iga i le nofoaga o le pisinisi i Kalaiesetete, o inā na vaaia ai e leoleo le tele o taavale gaoi.
I le faamasinoga na ta’ua ai le finauina e le itu a leoleo, e ala i le loia na tula’i mo leoleo, Crown prosecutor Will Taffs le 5 tausaga ma le ‘afa aga’i i le 6 tausaga e tatau ona faasala ai Abdul.
Na finau Taffs, e talafeauga ona o se gaioiga na iai lona faamoemoe e faataunuuina ma e lē o vaaia foi se tulaga salamō o lenei alii i lana mea ua fai.
Ae o le loia na tula’i mo Abdul, o Philip McDonnell, na ia faasoa i le faamasinoga, o gaioiga a Abdul Ahmadi e lē o se mea na ia fuafuaina, e le’i faapea foi na faia e faatupu ai le tigā i se tasi, ma ia faaalia foi tulaga faigatā o loo ia feagai o se tagata sulufa’i.
Faaalia le amata tilotilo o le alii faamasino, Judge Quentin Hix i le faasalaga e 5 tausaga, ona o le tele o aafiaga i to’atele o i latou ua aafia i lenei matāupu, ma e le’i avea foi le lelei o le pisinisi ma tulaga e ‘alofia ai le tulafono.
Ae na tuuitiitia mai lona faasalaga e ala i se talosaga e 35% ona o tulaga ma’ale’ale o iai o ia ma lona aiga; o lea na ala ai loa ona taunuu mai le faai’uga i le 3 tausaga ma le 3 masina.
Ua faamauina le fuafuaga a lenei alii Afghanistan e apili le faai’uga.
