Ua iai le isi tamaitiiti e 15 tausaga le matua ua molia foi i le fasioti tagata i le faalavelave lava lea na lipotia atu ananafi i talafou, ua uma ai le ola o le tamaitiiti e 17 tausaga le matua, na ta’ua na tui e le tagata tulou i se nofoaga e lata ane i se a’oga i Rouse Hill i Sini.
O le Aso Gafua o le vaiaso nei na tupu ai le faalavelave ma molia ai loa le isi 15 tausaga le matua i le fasioti tagata ina ua oo ane ma ona mātua i le ofisa o leoleo.
O le po anapo ua faailoa e le 9News na su’eina ai e leoleo se fale i Rouse Hill ma pu’eina ai le isi 15 tausaga lea ma molia ai loa foi i le fasioti tagata.
O le faamatalaga a leoleo e foliga e lē o iai ni sootaga o le matāupu lea i le a’oga maualuga a Rouse Hill lea e lata ane i le vaega na tupu ai le faalavelave.
O le asō lea na tula’i ai i le faamasinoga le isi 15 tausaga lea e lē o faailoaina foi le igoa ae o le isi lea na molia muamua ua faatulaga e toe tula’i i le faamasinoga i le aso 23 o Ianuari.
O loo tālia pea se lipoti auiliili mai leoleo i lenei faalavelave.
Puna o Faamatalaga: https://www.9news.com.au/national/rouse-hill-stabbing-second-teen-charged-over-alleged-stabbing-murder-of-boy-17-near-sydney-school/56bebe03-c34f-4bd3-b1a1-44b932e691c8
