E to’alua tagata na faavave atu i le falema’i mai le faaitu o Adelaide i le taeao analeila ona o se faalavelave na tula’i mai ai i le itu i Saute, e talitonu leoleo o se fale i Huntfield Heights na aga’i iai le osofa’iga a i latou na faatinoina le solitulafono.
Fai mai lipoti a le 9News e manatu leoleo o le osofa’iga lea na fuafuaina ma taula’i sa’o i le fale na osofa’ia.
Na tupu le faalavelave i le te’a o le ‘afa o le 6 i le taeao analeila taimi Ausetalia, na maua atu ai e leoleo tagata e to’alua o loo iai manu’aga mai se fana i totonu o lea fale.
Na faia iai e paramedics togafitiga ma faavave atu ai loa i le falema’i lea o loo iai pea i le taimi nei.
O loo iai pea leoleo i le fale na osofa’ia mo le faia o su’esu’ega poo le ā tonu le ‘auga o lenei faalavelave.
Puna o Faamatalaga: https://www.9news.com.au/national/adelaide-huntfield-heights-shooting-police/b6f1c80e-18c6-478b-afb1-96c0bcf51380
