Ua matua’i faaali le lē fiafia o le Palemia o Ausetalia o Anthony Albanese i faipule o le Itu Agai ua faailoa latou te lē taliaina le suiga o loo faaulu e le malo i le tulafono e faatatau i fana ma faamatalaga lē manuia, hate speech.
Fai mai Albanese e na te tuua’ia le soofaatasi i lo latou faapolokikiina o le matāupu ae faato’ā mae’a le faalavelave tele i Bondi.
O le amataga o le vaiaso fou e toe tauaofia ai le Palemene e iloilo le tulafono e pei ona faataatia ma faailoa i faipule i le Aso Gafua o le vaiaso nei.
Fai mai le 9News e ui i le tele o faipule o le soofaatasi sa vave lo latou upuia ma tuua’ia le Palemia i le tuai o ana gaioiga i le faalavelave na tupu i Bondi, ae to’atele ua lipotia o loo faailoa le faaluafesasi o finagalo i le pili e pei ona faaulufale nei i le Palemene.
Fai mai le Palemia e fai si ona ofo i le tulaga ua tula’i mai i faipule ia, toeitiiti o aso uma e valaau ai i le Palemene ia tauaofia ma fai se faiga i le faalavelave na tupu ae o lea ua faatū atu le pili ae ua ese foi a latou faamatalaga.
Puna o Faamatalaga: https://www.9news.com.au/national/bondi-beach-attack-hate-speech-laws-coalition-set-to-oppose-legislation/01ada667-aa0f-49d7-9c1b-efe9fc31849e
