O le vaiaso nei i le Aso Faraile i Samoa ae o le Aso Tofi lea i Peletania o le aso mulimuli lea o le fono lona 92 a le faalapotopotoga faavaomalo mo galuega faaleoleo na amatalia i le Aso Gafua o le vaiaso nei.

O lea autū o lea faalapotopotoga e ta’ua o le International Criminal Police Organization lea e ta’u faapuupuu o le InterPol, o le galulue faatasi lea e tali atu i gaioiga solitulafono e tutupu i atunuu o le lalolagi e pei o Samoa.

O le aai o Glasgow i Peletania o loo tauaofia ai lea fono tele faavaomalo o loo avea ai ma sui o Samoa le Komesina o le Matagaluega o Leoleo, Falepuipui ma le Toe Fuata’ina le susuga Auapaau Logoitino Filipo.

E 196 atunuu o loo auai o latou sui ma o ni tagata o loo avea ma faauluuluga o tautua faaleoleo e umia tulaga sinia i tomai tau tulafono.

O se faatasiga faaletausaga e talanoa ai i faiga faavae, ma auala e siitia ma faaleleia ai tomai a’oa’oina o leoleo i le faatinoga o galuega e tali atu ai i gaioiga tau solitulafono.

Ua faailoa i se pepa o faasalalauga o le tautua faaleoleo o le Malo i Samoa o loo lagolago i galuega a lea faalapotopotoga o tautua faaleoleo i le lalolagi, o se pine lea o le opogi e Samoa o taumafaiga uma e taofia ai faiga ma gaioiga tau solitulafono.

O le a taualuga le fono o loo usuia i le sa’ilia o se faauluuluga o le faalapotopotoga o le InterPol.