O le aso ananafi na usuia ai le fonotaga 11 a le sosaiete o Koluse Mumu i le lalolagi i le itu o Asia ma le Pasefika i Vietnam.

O lenei fonotaga o loo auai ai le Faauluuluga o le Koluse Mumu i le atunuu Namulauulu Tautala Mauala e feagai ai ma le faasoaina o manatu ma vaega auā le siitia ai o le auaunaga a le Koluse Mumu i le atunuu.

O le lava tapena i taimi o faalavelave faafuasei o le manulauti lea ma e ogatasi lea ma faatalanoaga ma saili tofa i finagalo o sui auai e faaaupegaina ai tagata lautele i taimi o faalavelave.

I lipoti mai lenei fonotaga, o sui auai uma o lea feagai lea ma le auiliiliga o faaiuga o mataupu mai le fonotaga lava lenei i le tausaga 2018 aemaise o le talanoaina o fuafuaga mo le itu Asia ma le Pasefika 2023-2026.

O se tasi o mataupu faaalia i lenei fonotaga o le tulaga lea i le ave o le faamuamua a Malo aemaise o faalapotopotoga faavaomalo o vaega e moomia i lenei auaunaga o loo faatino e le sosaiete.

Ia unaia foi le faaauauina e le lalolagi ona puipuia soifua mai fetauaiga o loo aliae mai i nisi o vaega o le kelope, taofia le pagatia ma le fiaaai, tuuitiitia le mativa ae unaia le atinaega o tamaoaiga e ala i le galulue faatasi o atunuu.

E silia ma le 400 sui taitasi mai atunuu o Asia ma le Pasefika o loo auai ai i lenei fonotaga.