O le fono lona tolu faavaomalo mo tagata e iai mana’oga tumau i le lalolagi o loo usuia i le vaiaso nei i le aai o Perelini i le atunuu o Siamani, o loo auai atu iai le faauluuluga o le faalapotopotoga o le Nuanua o le Alofa poo le NOLA le tofa Matā’afā Faasino Utumapu ma sui o le usugafono mai nisi o atunuu o le Pasefika.
O se fonotaga e pei ona faailoa i le upega tafa’ilagi a le Nuanua o le Alofa o loo talanoaina ai mataupu e fesoota’i i le faaleleia ma le siitia o auaunaga ma fesoasoani i le tulaga auai o tagata e iai mana’oga tumau i gaioiga tau i tapenaga i taimi o faalavelave matuiā.
O se tasi foi lea o mataupu sa faasoa ai le sui o Samoa i le fonotaga i le naunauta’iga ia auai tagata e iai mana’oga tumau i ia tapenaga uma.
O le Nuanua o le Alofa o se tasi o faalapotopotoga sa lagolago i tapenaga uma o le fonotaga i Siamani lea o loo lagolago iai ma le malo o Ioritana i le tapenaina ma le faatinoina o le taligamalo mo tagata e silia i le tasi le afe o loo auai.
