O le lona lua ai lenei o taamilosaga ua valaaulia ai le ‘au a alii ma tamaitai Malu o le Malo mai Niu Sila e pei ona malaga mai ai muamua i le tausaga e 2018.
O le taeao analeila sa vaaia ai le malosi o le lagolago a le ‘au lenei i lana taaloga ma le ‘au a le Ofisa o Tineimu a Samoa e ui ina aasa le la i le Malae o le Apia Park.
Na faaalia e se tasi o Satini Sinia a le Matagaluega o Leoleo a Niu Sila Tumanuvao Siki Ah-Shew le faamoemoe foi o le ‘au ma le faimalaga mai.
“E latalata i le 60 le aumalaga o loo auai i lenei taamilosaga o loo iai i latou o loo tapuai mai i Niu Sila auā le auaunaga i le atunuu.
“Manaia le matou ‘au i le tausaga nei ona o loo iai Saina, Filipino ma nisi mai atunuu eseese i le Pasefika o le isi vaega e manaia ai ona e iai nisi o alo o le atunuu o le taimi muamua lea ua malaga mai ai i Samoa.
“O le tāua la lena o le taamilosaga lenei o le avanoa i nai tama na o le ta’u lava e omai mai lea afioaga ae lei oo lava iai.”
Sa ta’ua e Tumanuvao le tulaga o le faatinoina o le auauanga ma taimi o tapenaga mo lenei taamilosaga.
“O le isi lea itu lelei e uiga i le Matagaluega o Leoleo its all about the welfare of our staff e faataatia lelei le fuafuaga aemaise lava matou lea e omai i le aumalaga auā e leai se uiga e fai ai fuafuaga ae leiloa poo ai e vaaia le saogalemu o le atunuu o le ala lena ia align lelei matou fuafuaga ma tapenaga o le taamilosaga lenei.”
O le taamilosaga lenei o le Teuila Tag e silia ma le 30 ‘au e aofia ai ma ‘au mai atunuu mamao lea o loo tausinio mo le siamupini o lenei tausaga ma o loo aofia ai ‘au a alii ma tamaitai lea sa tele na faagasolo i le asō.
O le aso a taeao lea e fuafua e faamae’aina ai lenei taamilosaga ma o loo mafai ona faatinoina ona o loo tuuina atu iai le tau’au o le kamupani telefoni a le Digicel Samoa ma nisi o kamupani o loo lagolagoina.
