Momoli sou finagalo i le Palemene a Niu Sila ina ia toe Faasa’o le Sese na fai i le Sitiseni a Samoa.
O loo faaauau pea ona savalia e nisi o tamalii o le atunuu ua sii o latou aao e ta’ita’ia le mau a Samoa i le lagolago atu i le pili poo le tulafono taufaaofi ua tapena iai le afioga i le alii Faipule o le Green Party, MP Teanau Tuiono, ina ia uunaia pea le savali ma taulogologo i soo se Samoa i tafa e fia o le lalolagi, o lo outou taimi lenei e toe faaali ai ma momoli atu i le Palemene a Niu Sila lenei feau tāua, ua tatau ona toe faasa’o le faaiuga sese na fai i le tausaga e 1982 e i latou na ta’ita’ia le faigamalo i lena tausaga, ma latou aveesea ai le aiātatau a tagata Samoa i lo latou sitiseni Niu Sila sa tatau ona iai.
O loo faagasolo fonotaga, o feiloaiga, o nisi foi vaega o loo savavali solo i totonu o taulaga faatau i Niu Sila nei, mo lenei lava mau e tasi, o loo tau faapulapula atu ina ia malamalama o tatou tagata ma naunau ai e faaali o latou finagalo pe latou te lagolagoina lenei tulafono taufaaofi, ae poo ā foi ni mafuaaga e afua ai ona latou lagolagoina le pili.
O le aso 29 o le masina lenei o Me e faagata ai le lafoina atu o nei finagalo faaalia poo submissions, ua moomia ai la ona vave ona e faatumu le vaega o loo faailoa atu i le LINK o loo i lalo, e ave sa’o ai lou finagalo faaalia i le upega tafailagi a le Palemene a Niu Sila mo le komiti filifilia o le a latou silasila toto’a i finagalo uma o le a faailoa atu.
A lē o lena, ia e vave faafesootai soo se tasi o i latou o loo taimua i faalapotopotoga o loo lagolago atu ia Tuiono ina ia latou faapupula atili ia te oe le tāua o lenei tulafono taufaaofi, ma faaali atu le auala e fai ai lau submission.
O faalapotopotoga e pei o le Pacific Leadership Forum, Le Fono Faufautua a Samoa i Aukilani, le Mau a Samoa I le Sitiseni 2024, faapea foi le loaloa o isi tamalii o Samoa ua lagolago mai e faaauiluma atili lenei feau tāua.
Manatua, o lo tatou nofoa’i ma faimea tuu, e ono tatou misia ai le avanoa lenei ua toe tatala mai e faasa’o ai e Niu Sila le mea sese sa latou faia ua noatia ai lo tatou avanoa aemaise lava i nai o tatou tuaa matutua sa soifua mai i le vaitau lea na ono faigofie ai ona avea i latou ma sitiseni o lenei atunuu.
