O le faauluuluga o faiga faavae i le faigamalo a le Atu Solomona ua ia faailoa, o le fuafuaga a lona atunuu e maua ai sitiseni e ala i polokalame tau inivesi o le a lē oo i se tulaga e manatu tasi ai na o tulaga faapisinisi ae galo ai tulaga patino i le atunuu.

Fai mai le lipoti a le Leitio Faavaomalo a Niu Sila ua saunoa le Palemia o le atunuu o Jeremia Manele, o lana faigamalo ua faataatiaina le ālafua mo le maua o sitiseni o tagata e ala i le polokalame lea tau inivesi ma ia faaopoopo ai tupe maua a le atunuu, ma o se fuafuaga o loo aofia i le lisi o mea o loo ave iai le faamuamua a le faigamalo i le ulua’i 100 aso o lana faigamalo.

O le faiga o lea polokalame e aga’i sa’o i tagata inivesi mai atunuu i fafo e maua ai le faaopoopoga i le tamaoaiga o le atunuu ma ua faailoa e le malo e umi lava se taimi faato’ā amata faagasolo lea fuafuaga ae ua faailoa foi e le vaega o le a feagai tonu ma le auaunaga lea, e ao ina manatua e tagata uma o le sitiseni o se sootaga tāua i le va o le tagata ma le atunuu.

Fai mai o le taimi nei o loo silasila foi le malo i itu uma e lelei ma lē lelei ai foi ituaiga fuafuaga faapea ia faamautinoa e sa’o ma tonu lona faatinoina.

Puna o Faamatalaga: https://www.rnz.co.nz/international/pacific-news/559263/solomon-islands-citizenship-by-investment-still-a-long-way-to-go