Ua faailoa manino mai e le failautusi o le Matāgaluega o le Soifua Mālōlōina a le Atu Kuki o Bob Williams ua faamaonia nei e to’atolu isi tagata ua aafia i le dengue fever poo le fiva o ponaivi i lo latou atunuu.
Ua faailoa e le failautusi e to’afā o loo aafia i le taimi nei ae lē o taofia i le falema’i ma o le isi na aafia muamua i le amataga o le masina ua ta’ua sa faimalaga i atunuu i fafo.
Fai mai le matāgaluega o loo mata’itū ma le toto’a lea tulaga ma vave logoina le atunuu pe a faaauau pea ona vaaia le faatupula’ia o tagata e aafia.
O le taimi mulimuli na pepesi ai le dengue fever i le Atu Kuki na faato’ā mae’a i le 2021 ma talu mai lea taimi sa manuia lava taumafaiga e taofiofia ai le toe aafia ai o nisi i le atunuu.
Ua toe faamanatu e le Matāgaluega o āuga masani o le dengue o le fiva, tigā o le ulu, maso ma sooga o le tino, faafaufau ma le faasuati tulou, ma le tigā o mata.
Puna o Faamatalaga: https://www.rnz.co.nz/international/pacific-news/559228/cook-islands-dengue-cases-confirmed-key-agencies-kept-abreast-of-the-situation
