Ua sainia se maliega a le Malo o le Atu Kuki ma Ausetalia ua faataga ai tagata o le Atu Kuki e toe foi i o latou atunuu, e litaea ma toe transfer pe ave atu iai a latou tupe sa teuina o le supa i Ausetalia e tuuina i le Cook Islands National Superannuation Fund.

O le minisita o le va i fafo ma femalagaa’iga a le Atu Kuki o Tingika Elikana sa iai i Sini i le vaiaso talu ai mo le sainia o lea maliega ma le minisita lagolago o auaunaga tau tupe a Ausetalia o Stephen Jones.

O lea maliega ua faataga ai le faigofie ona feavea’i o ia tupe teu i le va o atunuu e lua.

Fai mai Jones o le a maua ai se fesoasoani mo tagata o le Atu Kuki e toe fia foi i lo latou atunuu e litaea ai aemaise foi mo tagata Ausetalia e iai galuega e faia i le Atu Kuki.

Ua ta’ua o le a faataga ai foi ona lafo ane mai le Atu Kuki tupe teu a nisi mai lea atunuu e malaga ane ma nofomau i Ausetalia.

O le tali atu lea a Ausetalia i lana tuutuuga na faia ma le Atu Kuki, le Australia ‘Oa Tumanava Partnership ina ia silasila i auala e faafaigofie ai sootaga ma faamalosia ai le mafutaga a atunuu e lua.

Ua faatino lea maliega ina ua mae’a nisi o suiga sa faia i tulafono a atunuu uma e lua e mafai ai ona faatino lea suiga lelei.

Puna o Faamatalaga: https://www.rnz.co.nz/international/pacific-news/534073/cooks-and-australia-superannuation-mou