O le aso 28 o le masina nei o Tesema o le tausaga 2024 o le a mou atu ua atoa iai le 95 tausaga talu ona tuumalo le afioga i le Tamaaiga Afioga Tupua Tamasese Lealofi III na tagatavaleina e fitafita a le malo o Niu Sila faatasi ai ma nisi o sui o le Mau.
O le Aso Toonai 28 o Tesema o le tausaga e 1929 e tusa o tala faamaumau o Samoa i le taimi o pulega a Niu Sila na tula’i mai ai lea gaioiga.
Na tupu a o aga’i mai le solo umi mai Vaimoso a sui o le Mau a Samoa mo sona malo tuto’atasi e aga’i i Matautu i Apia e faafeiloa’i nisi o sui o le mau sa faaaunuua i Niu Sila ae ua toe foi mai i Samoa.
O le Aso Toonai na te’a nei 28 o Tesema o lenei tausaga o le a mae’a, na atoa iai le 95 tausaga o le Aso Toonai pogisa le Black Saturday.
