O loo i Samoa nei le Afioga Nanaia Mahuta o le Minisita o le Va i Fafo a Niu Sila i se tasi o fonotaga ma le Malo Samoa. 

O le aso ananafi lea na asiasi ai le Minisita i le afioaga o Poutasi ma faafeiloai ai i le ‘ava o le feiloaiga. I lipoti mai le upega tafailagi a le Minisita o ana asiasiga i le aso ananafi e aofia ai le Iunivesite Aoao o Samoa, o le maota gasegase i Motootua faapea ai ma le feiloaiga ma le Minisita o le Matagaluega o Pisinisi Lautele (Ministry of the Public Enterprise), Leatinuu Wayne Sooialo, i le nofoaga o le a fausia ai le maketi fou i Savalalo lea na faatama’ia e le afi i le 2016. 

O lea asiasiga i le aso ananafi i le nofoaga o le a fausia ai le maketi i Savalalo na auai ai foi ma sui o le ofisa a le Faalapotopotoga o Fanua i Samoa, Matagaluega o Tupe, Matagaluega o Felauaiga ma Galuega Tetele a le Malo ma le tele o sui o pisinisi lautele. 

O le fausiaina o le maketi i Savalalo lea na faatinoina ai foi i le aso ananafi le sainigalima a le Minisita o le Va i Fafo a Niu Sila ma le Afioga i le Minisita o Tupe, Mulipola Anarosa Ale-Molioo e tusa ai o le fesoasoani a le Malo o Niu Sila o loo fuafuaina e tuuina mai mo atina’e tau i le tamaoaiga o Samoa.